Agtultuloy ti implementasyon ti Smoke-free Homes iti Barangay Andres Bonifacio, Baguio City.
Iti panakiuman ti Bombo Radyo kenni Kapitan Janet Tiamzon, maysa daytoy kadagiti immuna a programada iti barangay a narugyan idi napan a tawen.
Nupay kasta, ita laeng a bulan a na-deputize dagitoy ken naipaayan ti pammalubos a mangited ti ticket kadagiti matiliwan ken masarakanda nga agar-aramat ti sigarilyo wenno vapes.
Kas paset iti daytoy a programa, dagiti barangay officials ket agrekorida kadagiti babbalay wenno aghouse-to-house visit dagitoy.
Agbisitada pay kadagiti establishimento tapno saludsuden nu adda dagiti smokers iti pagtaengan wenno pasdek sakbay nga ilista ken agmonitor dagitoy.
Panggep ti programa a mangipaay ti panakaammo maipapan iti dakes nga epekto ti panagsigarilyo kasta met a maallukoy dagiti smokers nga agsardeng iti bisyoda.
Kabayatanna, nailista ti 162 a pagtaengan nga addaan ti smokers manipud kadagiti lima a purok iti nasao barangay.
Iti agdama, planoda a mangipaay iti pammadayaw kadagiti maawagan nga smoke-free homes inton umay a tawen.
