LA TRINIDAD, BENGUET – Kinumpirmar ni Mayor Roderick Awingan nga adda ti smuggled a broccoli a naiserrek iti munisyo ti La Trinidad, Benguet.
Sigun kenkuana, sumagmamano kadagiti smugged a broccoli ti ginatang dagiti traders manipud iti siudad ti Baguio ken sadiay Metro Manila.
Gapu iti dayta, nagturong dagitoy iti opisina ni Atty. Atty. Jennilyn M. Dawayan, Regional Director ti Department of Agricuture (DA).
Napagsasaritaan dagitoy dagiti addang kontra iti nasao a pakaseknan.
Nangbukel metlaeng dagitoy iti Executive Order 160 wenno Municipal Anti-Vegetable Sabotage Task Force a mangsukimat kadagiti mailaklako a nateng iti merkado.
Innaklun ni Mayor Awingan a mapaka-alarma dagiti smuggled a broccoli agsipudta, magatgatang daytoy iti whole sale.
Sigun iti opisial, posible a dagiti sumagmaano a metlaeng a traders ti mangidandun kadagiti smuggled a nateng iti nasao a munisipyo.
Maipaima metlaeng ti nasao nga isyu kadagiti maseknan nga otoridad para iti umno nga imbestigasyon.
Impeksa ti Mayor a saan a kabaelan ti lokal a gobierno no dagitoy laeng ti agtigtignay a mangrisut iti nasao a pakasenan.
Impaganetget daytoy a kasapulan ti panagtitinnulong dagiti maseknan nga ahensiya tapno maprebentaran dagiti smuggled a nateng iti lokalidad.
Kabayatanna, makidkiddaw kadagiti maseknan nga ahensiya ti nainget a pannakaipatungpal ti anti-smuggling task forces.
Sigun kenni Awingan, panggepda nga agturong wenno mangisubmitir iti resolusyon kadagiti maseknan nga opisina ken otoridad tapno maipadanum ti nasao a pakaseknan.
Kidkiddawen metlaeng ti opisial iti publiko a suportaran dagiti produkto iti lokalidad ken saanen a gumatang kadagiti smuggled a nateng.
Malaksid iti dayta, mapaingetan ti information education campaign tapno mailawlawag iti publiko ti nagdumaan dagiti smuggled a nateng ken dagiti nateng a napataud iti lokalidad.//mp4
