Maipatungpal ti soft opening ti “PAG-AYWANAN CENTER PARA SENIOR” intun Oktubre 21 kas paset ti selebrasyon ti Elderly Month iti siudad ti Baguio.
Sigun kenni Councilor Betty Lourdes Tabanda, daytoy ti kaunaan a “Pag-aywanan Center” a maiyusuat para kadagiti medyo incapacitated a seniors.
Mabalin nga ibati ken aywanan dagiti volunteers dagiti senior cetizen iti nasao nga center.
Maadaan dagitoy iti nagduduma nga aktibidad a kas iti zumba, panag-ayayam ken dadduma pay.
Daytoy ket paset ti ordinansa nga impasa ti konsehal a nasken nga adda ti lugar para kadagiti natataengan.
Masarakan ti “Pag-aywanan Center” iti seniors center sadiay Barangay Salud Mitra.
Manamnama metlaeng a sumarunu a maadaan ti Barangay Aurora Hill ken Barangay Irisan.
Sigun kenni Councilor Tabanda, daytoy payleng nga addang ti aramidenda bayat a maur-uray ti pannakaileppas ti Home for the Elderly sadiay Irisan.
Kabayatanna, maragsakan ni Tabanda iti kina-adu ti bilang dagiti natatengan a nakipaset iti elderly health fair a naipatungpal idi kalman, October 2, 2026 sadiay CDRRMO.
Naidiaya ditoy ti naduma-duma a serbisyo kas iti libre a masahe, pukis, blood pressure checking, eye examination, ear examination ken dadduma pay.
Impetteng ti konsehal a babaaen iti selebrasyon ti elderly month ket maengganyo dagiti natataengan nga agbalin nga aktibo, productive ken empowered.//Bombo Noveh Organo
