Impakaamo ni Senator Sonny Angara ita nga aldaw a nakalukat daytoy a sumaruno kas secretary ti Department of Education (DepEd) kaspangarigan nga apointaran ni President Ferdinand “Bongbong” Marcos Jr. iti nasao a posision.
Sigun pay kenkuana, posible a saanna a liklikan ti posision kaspangarigan a maipaay daytoy kenkuana.
Nupay kasta, awan paylaeg ti “offer” manipod iti Malakanyang.
Rimmuar ti nagan ni Senador Angara kas sumaruno a secretary ti Department of Education idi napalabas a lawas nu sadinno, maysa ni Senate President Francis “Chiz” Escudero kadagiti mangirekrekomendar kenkuana.
Numan pay saan nga umno nga agkomento daytoy, kinuna ni Senador Angara a ti agbalin kuma kas secretary ti nasao nga ahensia ket agpokus iti kalidad ti edukasion ken ti “resource gaps” a kas ti kinaawan ti pagadalan ken “textbooks.”
Maipalagip a nagresign wenno immikat gamin kas secretary ti Department of Education ni Vice President Sara Duterte manipod iti gabinete.
Malaksid kas secretary ti Department of Education, nagresign wenno immikkat metlaeng ni Duterte kas vice chairperson ti National Task Force to End Local Communist Armed Conflict (NTF-ELCAC).
