BAGUIO CITY – SPEAK UP! WALK AWAY! MAKE A CHANGE! Daytoy ti mensahe ti co-founder ti Bayanihan Women Advocate kadagiti padana a babbai kagiddan ti panakarambak ti Womens Month ita a bulan.
Iti panakiuman ti Bombo Radyo Baguio, imbinglay ni Khristine Esteban Molitas nga adda ti sumagmamano a pagayam daytoy a biktima ti panagabuso.
Kinunana a ginuyogoyna dagitoy nga ipeksa ken ikammangda ti pakaseknanda kadagiti umno ken mapagtalkan nga indibidual tapno matulongan dagitoy.
Dinakamatna nga adda dagiti daduma a biktima ti panagabuso a mangbukbukod iti pakaseknanda tapno laeng saan a marakrak ken mababalaw ti pamilyada.
Inayonna nga adda met dagiti babbai a mangpanunot a saanda a kabaelan a biagen ti pamilyada isut gapuna nga ib-ibturanda ti panagabuso dagiti asawada.
Impettengna a saan a rumbeng daytoy nga aramid gaputa mamati iti pagsasao a “violence is cycle” no sadino mailaylayon ti aramid ti asawa no saan a maipaayan ti pannusa.
Impaganetget ni Molitas a napigsa ken natibker ti pakinakem dagiti babbai isut gapuna a kabaelanda a pasayaaten ti kabibiagda a saan a nakadependar iti daduma a tao la ketdi kayaten ken itulokda daytoy.
Kabayatanna, impeksa ni Molitas ti suportana iti panakaipasa ti diborsio iti Pilipinas nangruna no maab-abuso dagiti babbai iti sidong ti asawada.
Inaklonna nga adda ti negatibo nga epekto ti panagsina ti agasawa gaputa marakrak ti binukelda a pamilya ngem inlawlawagna a nasaysayaat daytoy tapno malapdan ti posible a panakapasamak ti nasursurok ngem iti panangdangran.
