BAGUIO CITY – Temporaryo a maisubli iti sink hole area sadiay Magsaysay wenno iti sigud a terminal ti Philippine Rabbit ti staging area wenno paradaan dagiti parapubliko a jeep manipud La Trinidad ken Tublay, Benguet.
Iti panakiuman ti Bombo Radyo Baguio, inlawlawag ni PLt.Col. Oliver Panabang, dadaulo ti Traffic Enforcement Unit ti Baguio City Police Office a daytoy ket gapu iti panakaipasidong iti hard lockdown ti Slaughter Compound kasaruno ti killaat a panagngato ti kaso ti COVID-19 iti nasao a barangay.
Maipalagip a naiyakar sadiay Slaughter Compound ti terminal dagiti parapubliko a jeep nga agbibiyahe iti La Tirinidad ken Tublay manipud nangrugi ti community quarantine.
Nupay kasta, imbilin ni Mayor Benjamin Magalong ti temporaryo a panakaisubli ti staging area ti jeep iti sink hole area agingga nga agpaso ti lockdown sadiay Slaughter Compound ken maileppas ti contact tracing ken disinfection iti nasao a lugar.
Kinuna ni PLt.Col. Panabang a paset daytoy ti addang ti lokal a gobierno ti siudad tapno maipatalged latta ti seguridad ti publiko nangruna dagiti pasahero ti probinsia ti Benguet kontra iti COVID-19.
