BAGUIO CITY – Naan-anayen a naipawil ti panangaramat ti garbage hauler ti siudad ti Baguio iti staging area daytoy sadiay Lamtang, Puguis, La Trinidad, Benguet.
Iti panakipatang ti Bombo Radyo kenni Eng. Eugene Buyucan, officer-in-charge iti General Services Office ti Baguio City, kinunana nga idi kalman ket napawilan dagiti garbage trucks ti siudad a sumrek iti nasao a lugar tapno mangikayar kuma kadagiti basura kadagiti trak ti hauler dagiti nasao a basura.
Gapu iti napasamak, kinunana a maituloy ti pannakaaramat ti paset ti Dairy Farm sadiay Marcos Highway kas temporaryo a transfer area dagiti basura ti siudad nangruna ta pinalubusan daytoy ti Department of Environment and Natural Resources.
Dinakamatna a nagtitinnulong dagiti maseknan nga opisina iti lokal a gobyerno tapno maaladan ti nasao a paset ti Dairy Farm tapno saan a mabuya dagiti motorista ti pannakaiyakar dagiti basura.
Impanamnama pay a saan a maitambak dagiti basura ti siudad sadiay Dairy Farm gaputa dagus a maiyakar dagitoy kadagiti trak ti garbage hauler tapno maiturong dagitoy sadiay Urdaneta, Pangasinan.
Kagiddan iti daytoy, iyap-apela ni Buyucan ti panakibinnadang dagiti umili iti panakakissay dagiti basura a mapapataud iti siudad babaen iti panagresiklo dagitoy kadagiti mabalin pay a maaramat.
Impettengna a babaen iti nasao nga addang ket maksayan ti gastos ti lokal a gobyerno iti panaka-akop ken panakaibelleng dagiti basura ti siudad.
