BAGUIO CITY – Regular ti validation ken data cleansing ti DSWD-Cordillera iti status dagiti benipisaryo ti Pantawid Pamilyang Pilipino Program (4Ps) iti rehiyon.
Iti interview ti Bombo Radyo Baguio kenni Fatima Florendo, Regional Program Coordinator ti 4P’s iti Cordillera, kinunana a nainget ti monitoringda iti progarama pakairamanan dagiti maaw-awatda a sumagmamano nga reklamo kadagiti benipisaryo.
Karamanen ditoy dagiti maatap a panakaisalda dagiti ATM Cards, panagaramat iti personal a gastos babaen ti cash grants kadagiti ubbing ken dagiti maatap a saan nga kwalipikado a miembro ti 4P’s.
Inyunay-unayna a nainget a dumalan iti panagsukimat ti ahensia dagiti benipisaryo kas kasukat dagiti nagturpos babaen ti Listahanan wenno ti assessment sakbayda a makwalipikar.
Nasken met a silulukat dagiti miembro iti aniaman nga kondisyon ken criteria ti programa tapnu agtultuloy ti membership dagitoy.
Impeksana pay a saan a dagus a maipakkat dagiti miembro nu adda dagiti maiyuman wenno maawatda nga report gaputa dumalanda pay iti validation ken interventions dagiti enumarators a kadawyan ket personal nga agturturong kadagiti benipisaryo.
