BAGUIO CITY – Naipaulog ti status quo para iti aniaman nga aktibidad iti Puguis Communal Forest kasaruno ti civil case nga impila ti Pamilya Tiotioen kontra iti lokal a gobyerno ti La Trinidad, Benguet.
Nailanad iti pammilin ti Regional Trial Court (RTC) a napagnumuan ti dua a benneg ti panakamintinir ti status quo iti nasao a bantay ken iti panagtungpalda iti nasao a banag bayat nga awan pay ti desisyon iti preliminary injunction a kidkiddawen ti Pamilya Tiotioen.
Saan met a nangipaay ni RTC – Branch 62 Presiding Judge Danilo Camacho iti desisyon iti aplikasyon ti nasao a pamilya para iti preliminary injunction gapu iti sumagmamano a pakaseknan.
Sagudayen ti status quo a maipawil ti aniaman nga aktibidad a maipatungpal iti partikular a paset ti bantay ken aniaman a panaglabsing ti pamilya Tiotioen iti status quo ket mangitunda iti panakaibasura ti kaso ken iti benneg ti lokal a gobyerno ket ti panakaipaay ti makidkiddaw a preliminary injunction.
Nagpagnumuan met ti dua a benneg ken ti korte a mangipatungpalda iti ocular inspection iti makukwestionaran a disso inton Hunyo 6 bayat a maituloy ti panakatingiting ti kaso inton Hunyo 14.
