BAGUIO CITY – Nangiruar ni Mayor Benjamin Magalong iti maysa nga Executive Order para iti strikto a pannakaipatungpal ti stay-at-home restrictions kadagiti indibidual nga agtawen iti nasursurok iti 65.
Maibasar iti excutive order a pinirmaan ti mayor, agbalin nga epektibo ti pammilin ita nga aldaw, Nobyembre 17 aginggat 27 iti agdama a tawen.
Nakalanad iti pammilin nga adu kadagiti nakaptan iti COVID-19 iti siudad kadagiti napalabas nga aldaw ket dagiti agtawen iti nasursurok iti 65.
Nupay kasta, mapalubusan latta dagitoy a rumwar no adda iti umno a rason kas iti panagturung ti pagagasan ngem masapul nga adda ti mangkadwa kadakuada.
Mainaig iti dayta, maiserra ti Office of the Senior Citizen Affairs (OSCA) para kadagiti aktibidad ken walk-in transactions kadagiti nadakamat nga aldaw.
Iti baet daytoy, maipatungpal latta ti skeleton workforce tapnu adda iti mang akomodar kadagiti pakaseknan dagiti natataengan.
