BAGUIO CITY – Manamnama a mairugi inton sumaruno a lawas ti Step 2 ti panagparehistro iti Philippine Identification System wenno National ID ditoy Baguio City.
Iti panakiuman ti Bombo Radyo Baguio, kinuna ni Philippine Statistics Authority-Cordillera Chief Administrative Officer Adrian Cerezo, kinunana a daytoy ti maikadua ken maudi a proseso iti panagaplikar ti National ID, no sadino, ditoy a maala ti litrato ken biometrics.
Dinakamatna nga adda ti lima a registration kit a nailatang para kadagiti umili ti siudad ken maisayangkat ti panagparehistro sadiay SM Baguio tapno maipasigurado a masurot latta ti social distancing.
Kinunana nga umuna ti Barangay Irisan a mairehistro sakbay a maisaruno dagiti dadduma a barangay iti siudad.
Nupay kasta, maiyudi dagiti purok ti Irisan a naipasidong iti lockdown.
Inlawlawagna pay a saan paylaeng a mabalin a mairehistro dagiti agtawen iti lima nga agpababa gapu iti paglintegan ti IATF a malimitaran ti panagruar dagiti ubbing partikular dagiti lugar a naipasidong iti GCQ.
Kabayatanna, imbinglay ni Cerezo a nangato ti acceptance rate dagiti umili iti nasao a programa gaputa malaksid nga awan ti mabayadan ket pagnumaran pay ti National ID kadagiti nagduduma a transaksion iti gobyerno.
Kinunana nga ita a bulan ket puntiryada a mairehistro ti 3,500 nga umili ti Apayao; 6,677 iti Benguet; 9,000 iti Ifugao; 11,000 iti Kalinga ken 3,500 iti Mountain Province.
Mangnamnama pay daytoy nga awan ti agpositibo iti COVID-19 kabayatan ti aktibidad gaputa no mapasamak daytoy ket makanselar ken maitantan manen ti panagparehistro para iti National ID a naituding nga agleppas inton Disyembre ti agdama a tawen.
