BAGUIO CITY – Nagbalin a natalinaay ti panangiserbi ti nagtipon a pwersa ti Mines and Geosciences Bureau (MGB)-Cordillera, Community Environment and Natural Resources Office, Tuba Municipal Environment and Natural Resources Office ken ti Tuba PNP iti stoppage order kontra kadagiti minero nga iligal nga agminminas sadiay Barangay Ansagan, Tuba, Benguet.
Sigun kenni Engr. Sammy Paquit, dadaulo ti MENRO-Tuba, idi paylaeng napalabas a tawen a nakaaw-awatda iti reklamo seknan iti nasao a pagminasan vbayat a naipaulog ken naiserbi ti umuna nga stoppage order idi October 4, 2017 ngem naduktalanda manen ti panagtuloy ti operasyon idi laeng napalabas a bulan ti Pebrero.
Gapu iti daytoy, nangisayangkat iti inspeksion ti MGB-Cordillera iti namindua a daras iti nasao a lugar sakbay a naipatungpal ti taripnong idi Pebrero 21 ken 26.
Innayonna nga idi laeng kanikadua ket inserbida ti maikadua nga stoppage order kontra kadagiti maseknan a minero ken apaman a nakasampetda sadiay ket dagus nga indepensar dagiti minero a nabayagen nga insardengda ti panagminas sadiay.
Nupay kasta, maibasar kadagiti ebidensia a nakalap ket agtultuloy ti operasyon dagiti nasao a minero iti tallo nga usok sadiay.
Iti panakidayalogoda kadagiti maseknan a minero, imbilinda ti panagtungpal dagitoy iti stoppage order.
Naituding nga agsubli manen dagiti ahensia sadiay Barangay Ansagan inton Marso 15 tapnu mangisayangkat ti inspeksion.
Naamuan met a kiddawen to dagiti nasao a minero a maideklara a Minahang Bayan ti nasao a lugar tapnu agbalin a legal ti operasyon dagitoy.
