BAGUIO CITY – Mabalinen ti strawberry picking kadagiti turista nga agturturong iti nalatak nga Strawberry Farm iti Swamp Area sadiay Betag, La Trinidad, Benguet.
Sigun kenni Peter Bulangen, presidente ti Swamp Farmers Association, Incorporated, nangrugin ti panakaidiaya ti strawberry picking kadagiti agpaspasyar sadiay.
Dinakamatna a ti nasao nga aktibidad ti kangrunaan a birbiruken dagiti turista a sumarsarungkar sadiay.
Impanamnamana met a masursurot ti minimum public health standard kadagiti amin a sumarsarungkar sadiay ken masuksukimat dagiti dokumento dagitoy kas iti vaccination certificate.
Naamuan a nasurok iti 20 a mannalon ti strawberry sadiay ti mangididiaya ita ti strawberry picking nupay dagiti dadduma ket saan paylaeng nga agpapauneg ti turista iti pagmulaanda.
Maipalagip a bassit laeng dagiti mannalon a nagmula ti strawberries kabayatan ti pandemya ken adu kadagitoy ti nagmula ti nateng.
Iti agdama, agtaltalinaed a P500 ti tunggal kilo iti strawberry picking bayat a P220 ti tunggal kilo dagiti naapiten nga strawberries.
Kabayatanna, tinagiragsak dagitoy ti panakailukat manen ti turismo iti Benguet ken mangnamnamada nga in-inot a makabawi dagitoy manipud iti panakalugida kadagiti napalpalabas a bulan gapu iti nagbalin nga epekto ti pandemya iti sektor ti turismo.
