BAGUIO CITY – Rinebbek dagiti pulis ti maysa a gambling den wenno sugalan iti maysa a subdivision sadiay Dagupan Weste, Tabuk City, Kalinga.
Resulta daytoy ti impormasyon a naawat dagiti pulis manipud iti barangay kagawad sadiay seknan iti manarimaan a panagay-ayam ti sumagmamano nga indibidual iti mahjong.
Naamuan a nakalibas dagiti indibidual nga agsusugal apaman a nakasangpet dagiti pulis iti ayan ti sugalan.
Nupay kasta, balligi a nakemmeg dagiti pulis ti maatap nga operator ti sugalan ken agtagikua iti balay a nabigbig a ni Andy Penco Galicia, 50-anyos, naasawaan ken negosyante.
Nakumpiskar iti operasyon ti 142 a pidaso ti mahjong tiles, maysa a dice ken taya a P1,100.
Impila metten ti pulisya ti kaso nga iligal a sugal kontra kenni Galicia.
