Sumagmamano a botante iti siudad ti Baguio ti makaaw-awat iti card manipud iti maysa a partylist no sadino iti nasao a card ket nakasurat ti nasao a partido, ti nagan ti botante ken ti “volunteer.”
Gapu iti dayta, madanagan dagiti daduma a residente no nalabsing kadi iti privacy-da nangruna ket saan met a nadamdamag dagitoy nga agbalin kas maysa a volunteer iti nasao a partylist.
Iti panakiuman ti Bombo Radyo kenni Atty. John Paul Martin, election officer iti siudad, kinunana a kinitana no ti nasao a partylist a mairekreklamo ket nagkiddaw iti listaan dagiti nagan dagiti botante no apay a nakaiwarasda iti card a nakakarga dagiti nagan dagiti botante.
Nupay kasta, idi beripikarenna ket saan daytoy a karaman kadagiti nagkiddaw iti nagan dagiti botante.
Gapu iti dayta, inlawlawagna a saan a nagtaud iti Commission on Elections-Baguio dagiti impormasyon dagiti botante gapu ta adda met dagiti daduma a mabalin a pagalaanda kadagiti nasao nga impormasyon.
Sigun kenni Atty.Martin, ti panagbalin a volunteer iti maysa a kandidato wenno partylist ket nasken a “conscientious” wenno nakasao dagitoy ken naala iti pangngeddengda ken saan a mabalin a basta-basta ti panangikarga iti nagan ti maysa a nagan kas volunteer.
Al-allukoyen met ni Atty.Martin dagiti daduma pay a botante a nakaawat kadagiti card nga awan iti pammalubosda a mabalin nga ireklamoda daytoy.
Naituding a mangipaay met ti COMELEC-Baguio iti show-cause order kadagiti mangipatpatungpal iti nasao a banag tapno ilawlawagda daytoy.
