BAGUIO CITY – Temporario nga impaserra iti Environmental Health and Sanitation Division (EHSD) iti Baguio City ti sumagmamano a commercial water providers ken food establishment kalpasan a napaay iti bacteriological water quality tests a naisayangkat manipod Enero agingga Hunio.
Iti report iti EHSD, 11 iti 31 a commercial deep wells, siam a water refilling stations, ken 25 water delivery services ti saan a nakapasa iti panagsukimat.
Napaay metlaeng iti testing ti service water iti 10 a food establishments ken ice cubes iti 21 nga establisimiento.
Sigun kenni EHSD chief Albert Pay-an, nadutukan dagiti naapektaran a negosio nga isardeng paylaeng ti operasion, mangisayangkat iti sanitation ken maintenance, ken maipasidong iti baro a laboratory testing sakbay a mapatgan nga aglukat manen.
Naikeddeng metlaeng nga ipaserra iti siudad ti siam a water refilling stations a naduktalan nga awanan iti business permit.
