Mairekreklamo dagiti sumagmamano a kargador ken indibidual a mangar-aramat kas pag-isbuan ken pag-iinuman ti jeep terminal iti paset ti barangay Harrison Carrantes Claudio.
Iti panakiuman ti Bombo Radyo iti saannan a kayat nga agpabigbig ken maalaan iti voice clip kanayun a maang-angotda ti kina-angseg ti terminal iti tunggal agsapa nangruna no mangrugi dagitoy nga agbyahe.
Malaksid iti dayta, ket pasaray madanunanda ti agkaiwara a bote ti arak a nag-inuman dagiti agtatambay sadiay kabayatan ti panang-urayda a malpas wenno agsara ti night market.
Impaganetgetna a saan dagiti drivers wenno dagiti kakadwada a drivers ti mangar-aramid kadagiti nasao a banag no diket dagiti kargador ken dadduma pay nga agtamtambbay sadiay.
Impeksana a sakbay a malpas wenno madanun ti last trip dagitoy iti oras ti alas 10 iti rabii ket agdalus dagitoy, ngem nu sangpetanda iti oras ti first trip wenno byahe dagitoy ket dita dan a maimatangan ti nasao a parikut ti kina-angseg kadagiti kanal ken agkaiwara a bote ti arak ken dagduma pay a basura.
Kinunana pay nga adda ti multa nga ipapaayda kadagiti kakadua dagitoy nu makitada mismo nga agisbo sadiay no sadino ket dumanon iti P500 ti multa dagitoy.
Nupay kasta nai-umanda daytoyen iti kapitan ngem agtultuloy ladta ti nasao a parikut.
Kabayatanna, kas maibasar iti naudi a naangay a meeting dagitoy iti bulan ti pebrero wenno marso, kadwada dagiti kameng ti City Disaster Risk Reduction Management Office, Baguio City Police Office, barangay officials, ken daduma pay a maseknan nga opisina nga adalenda ken kitaenda iti pannakaimuntar ti portable a comfort room.
Sigun iti nakapatang ti Bombo Radyo a driver, umanamong met dagitoy iti nasao a plano tapno adda metlaenng iti asideg wenno accessible a pag-isbuan sadiay, nangruna ta adda pay ti mentally disturb nga indibidual wenno mendicant a pasaray makitada a matmaturog sadiay ken no makariing dagitoy ken umisboda lattan iti pader sadiay.//Bombo Noveh Organo
