Idagdagadag dagiti sumagmamano a mammanday-linteg ti House of Representatives kenni President Ferdinand “Bongbong” Marcos Jr a mangawag iti special session ti Kongreso tapno mapalubosan ti Senado nga agtitipon kas impeachment court para iti “trial” ni Vice President Sara Duterte.
Ti panangawag ket manipod kadagiti mammanday-linteg a Makabayan block a buklenda France Castro ti ACT Teachers party-list, Arlene Brosas ti Gabriela party-list, Raoul Manuel ti Kabataan party-list.
Impaganetgetda a kiniddaw ti publiko ti “accountability,” a mangidagdagadag iti Presidente nga agtignay ken saanna nga urayen dagiti pormal a kiddaw manipud kenni Senate President Francis Escudero wenno House Speaker Martin Romualdez.
Inkalintegan dagiti mammanday-linteg a ti petision ni Duterte ken dagiti kaalyadona iti sango ti Korte Suprema (SC) a mangwaswas iti impeachment complaint ket ad-adda a napateg ti panangibabaet ti Presidente.
Binabalaw pay ti nasao a grupo ti pannakaitantan ti “trial,” ken namakdaarda a dadaelenna ti hustisia.
Kabayatanna, impaganetget pay dagiti mammanday-linteg ti Makabayan a ti panangisayangkat iti impeachment trial ti Bise Presidente ket mangpadayaw iti maika-39 nga anibersario ti EDSA People Power Revolution.
Maipalagip a kinuna ni Senate President Francis “Chiz” Escudero saan a mabalin nga ituloy ti Senado ti impeachment trial malaksid nu umawag ni President Marcos tapno maisayangkat ti special session.
