Saan nga immanamong dagiti sumagmamano a pro-modernization groups iti panggep ti Department of Transportation (DOTr) a mapalubusan dagiti unconsolidated jeepney operators nga agbiahe manen kadagiti rutada, bayat a maur-uray ti sumagmamano a pagannurotan.
Iti panagsaritana iti news forum sadiay Quezon City, kinuna ti Liga ng Transportasyon at Operators ng Pilipinas (LTOP) a ti agtultuloy nga operasion dagiti unconsolidated jeepney ken dadduma pay a colorum vehicles ket apektaranna ti viability ti negosioda.
Nagturong pay dagiti kameng ti National Federation of Transport Cooperatives (NFTC) iti opisina ti DOTr idiay San Juan City tapno agkiddaw ti pammalawag manipod kenni Transport Secretary Vince Dizon.
Kinuna ni NFTC National Chairperson Misael Melinas a nupay immunan nga inkari kadakuada ni Dizon a saan a masuspindir ti Public Transport Modernization Program (PTMP), ti panangipaay ti concessions kadagiti unconsolidated groups ket mabalin a makaapektar iti panagtalek dagiti bangko ken mangipapaay kadagiti moderno a yunit ti jeepney.
Ngem kalpasan ti pannakipagtaripnong iti secretary, kinuna ni Dizon babaen kenni NFTC President Ed Comia a saan nga “automatic” a mapalubosan nga agsubli iti kalsada dagiti unconsolidated jeepney.
