Mapaspasaranen ti sumagmamano a residente ti munisipyo ti La Trinidad ti kinarigat ti danum manipud iti La Trinidad Water District iti baet ti pasaray panagtudona ken bayata a saan pay a naideklara ti summer.
Sigun iti impormasyon a nakalap ti Bombo Radyo, sumagmamano kadagiti residente wenno boarders ket halos makabulanen nga awan ti danum a dumandanon kadakuada iti laksid nga agbaybayad met dagitoy ti minimum ti nasao a water district.
Dagiti dadduma payen ket mangnamnama laengen iti tudo tapno makasakdo ti umanay nga usarenda kadagiti pagtaengan wenno boarding house dagitoy, bayat a dagiti dadduma ket makidigosda kadagiti amammoda nga addaan ti nawadwad a danom.
Nu saan, agturturongda kadagiti am-ammoda iti siudad ti Baguio tapno makidigos wenno makilaba.
Iti pay nakalap nga impormasyon ti Bombo Radyo kadagiti saanen a nagpabigbig nga indibidual, regular nga adda ti danum dagiti dadduma a lugar a supsuplayan ti nasao a water district isu’t gapunna a makweskwestionaran dagiti dadduma a lugar nga awan ti regular a suplay ti danumda.
Impeksa pay dagitoy a saan laeng nga ita a tawen daytoy a pakaseknan nu diket uray pay kadagiti napalpalabas a tawen.
Nupay adda ti naituding nga schedule, saan metlaeng daytoy a masursurot.
Awan metlaeng ti mapasangpet a danum dagiti dadduma a lugar nangnangruna kadagiti adda iti nangangato a paset ti kalsada agingga a mabulanan daytoyen.
Sigun pay iti nakalap ti Bombo Radyo Baguio nga impormasyon, nupay adda ti danum, saanen a makasang-at daytoy gapu ta maar-aramatan daytoy iti machine a mangsupsop ti danum nga adda kadagiti nababbaba a lugar.
Malaksid iti dayta, nupay adda nga agpayso ti danum a sumangpet, pang-maysa oras laeng, bassir laeng ken saanna a kabaelan a makapunno ti drum dagitoy.
Kinuna dagiti nasao nga indibidual, maawatanda nu agtiptipid dagitoy iti danum ngem gapu ta napudot ken masansan ti nasao a pakaseknan, rumbeng a suroten dagitoyen ti umno nga schedule tapno regular a maipaayan ti dadum dagiti amin a customers dagitoy. //Bombo Noveh Organo
