Umap-apela dagiti sumagmamano a residente idiay SLU-SVP Old Site, Bakakeng Central, Baguio City kadagiti maseknan gapu iti kinaawan ti jeep a bumabbaba sadiay sipud pay naikeddeng ti nainget a pagannurotan ti pandemya.
Iti panakiuman ti Bombo Radyo kenni Jodel Buenaventura, residente iti nasao a lugar, awan ti nagbanagan ti dua a petisyon nga impila dagiti senior citizen seknan iti nasao nga isyu.
Sigun kenni Buenaventura, marigatan dagitoy a sumang-at iti paset ti kalsada iti lugarda partikular dagiti senior citizen ken dagiti estudytante.
Nupay adda ti taxi a mabalinda a luganan, kinuna ni Buenaventura a “convenient” ladta para kadakuada dagiti jeep.
Innayon pay ni Buenaventura a saanda nga ammo ti rason nga awan ti bumaba a jeep iti lugarda iti laksid a nasayaat ken simentado ti kalsada.
Gapu iti dayta, kinuna ni Buenaventura a panawenen nga ipaay metten dagiti maseknan nga opisyales ti atensyonda iti panakarisut ti nasao a pakaseknan.//Bombo Rob Dominguez
