Agrekreklamo dagiti sumagmamano nga indibidual kalpasan a natakaw dagiti sabong nga insagotda kadagiti pimmusay nga ay-ayatenda a biag kadagiti sementeryo iti kaleppas nga undas 2025.
Mapapati a dagiti sabong a natakaw ket nailako manen kadagiti nagbisita iti sementeryo.
Iti panakiuman ti Bombo Radyo iti maysa nga agbanbantay sadiay, kinunana a dagiti agal-ala iti sabong kadagiti panchon ket dagiti pamilya dagiti sumagmamano a miembro ti Baguio City Cemetery Contractor Association ken dadduma pay.
Kinunana pay nga adda metlaeng dagiti sumagmamano a pamilya dagitoy a magapu sadiay lowland no sadino panawen laeng ti undas a sumang-at dagitoy iti siudad.
Malaksid iti dayta, nagwaras metlaeng iti social media dagiti sumagmamano nga ubbing nga agpaspasyar ken agal-ala iti banag manipud kadagiti panchon.
Nabigbig metten dagitoy dagiti lima nga ubbing no nakatungtongda dagitoyen.
Inaklon met dagiti ubbing a nagalada kadagiti kandila tapno adda ti ilako-da a pangnayonda iti allowance dagitoy.
Nupay kasta, pinaglibakanda a saan a dagitoy ti nagala kadagiti napukaw a sabong.
Saan metten dagitoy a naireport wenno awan ti pormal a reklamo agsipud ta nakitada laeng dagitoy iti social media.
Immunan metten a naireport ti kinaadu ti presensya dagiti ambulant vendors iti baet a nainget ti panagbantay dagiti otoridad bayat ti nasao nga aktibidad.//Bombo Noveh Organo
