Rose Garden, Baguio City- Linagip dagiti sumagmamano nga opisial nangruna dagiti Ibaloi officials iti siudad ti Baguio ken probinsia ti Benguet dagiti pammabalaw wenno diskriminasion a naawatda nangruna dagiti Ibaloi elders nga immuna a nagtaeng iti Benguet bayat ti panagrambak ti Opening of National Indigenous Peoples Month ken Ibaloi Festival idi kalman, Oktubre 12, 2024.
Imbinglay ti pannakabagi ni Benguet Governor Melchor Diclas dagiti pakasaritaan a napasaran dagiti immuna nga Ibaloi elders a nangngeganna.
Sigun kenkuana, dagiti Ibaloi ti immuna a nagtaeng iti Benguet a nangaywan iti daga ken nagtagikua kadagitoy, ngem dagitoy metlaeng ti naawanan gapu kadagiti colonizers a kas ti Amerikano ken Espanyol a nangsakop ti Pilipinas.
Gapu iti dayta, kayatda nga ipatawid kadagiti agtutubo dagiti kultura, tradision ken values ti Ibaloi tapno mapreserba ken maaywanan tapno madanunan met dagiti summaruno pay a henerasion.
Kabayatanna, pagyamyamanan met dagiti dadduma nga opisial a naipasa ti Indigenous Peoples’ Rights Act of 1997 (IPRA) a mangsalsalaknib iti karbengan dagiti indigenous iti Pilipinas.
