Impakaamo ti Department of Information and Communications Technology (DICT) nga agtultuloy ti panagmonitorda kadagiti sumagmamano nga scam hubs nga agpampammarang kas Business Process Outsourcing wenno BPO companies iti pagilian.
Daytoy ket kasaruno ti kaudian a viral video a mangipakpakita ti maysa nga scam hub idiay Cebu a puntiria dagiti mangmangged a Pilipino dagiti foreign nationals idiay South Africa.
Maipakpakita pay iti video nu kasano ti operasionda babaen ti panangallilaw kadagiti ganggannaet iti investment scam babaen ti peke a website.
Saanen nga impablaak ni DICT spokesperson Assistant Secretary Renato Paraiso ti datos nu mano kadagiti hubs ti agpampammarang kas Business Process Outsourcing ngem imbutaktakna a kaaduan kadakuada ket adda iti highly urbanized areas.
Adalenda metlaeng ti posible a nagkurangan ti lokal a gobierno iti nasao a lugar nu apay nga agop-operate dagiti scam hubs.
Kabayatanna, kinuna ti DICT nga imbestigaranda dagiti alegasion dagiti Chinese nationals nga addaan iti expired visa a mangmangged iti maysa a telecommunications company iti pagilian.
