BAGUIO CITY – Maipatungpal ti scheduled power interruption kadagiti nagduduma a paset ti Baguio City ken probinsia ti Benguet inton Oktobre 27, aldaw ti Biyernes.
Sigun iti National Grid Corporation of the Philippines (NGCP) – North Luzon, maapektaran ti intero a munisipyo ti Atok, Kapangan, Kibungan, Bokod, Kabayan, Buguias, Mankayan, Bakun malaksid laeng iti Kapaya Proper ken iti sumagmamano a paset ti Tublay.
Mangrugi ti power interruption iti alas-onse ti agsapa agingga alas-dos ti malem para iti maipatungpal a maintenance, installation ken reconnection kadagiti linya ti NGCP.
Kabayatanna, igiddan met ti Benguet Electric Cooperative (Beneco) ti scheduled power interruption iti nasao metlaeng nga aldaw mangrugi iti alas-nuebe ti agsapa agingga alas-singko ti malem.
Sigun iti Beneco, maapektaran ditoy ti sentro ti siudad ti Baguio agingga iti paset ti Crystal Cave, Balacbac, Green Valley Country Club ken iti masakupan ti Tuba, Benguet.
Mangrugi met ita nga aldaw agingga inton Huwebes ket mapasaran iti sumagmamano a paset ti siuad ti Baguio, munisipyo ti Itogon ken munisipyo ti Sablan ti scheduled power interruption.
Daytoy ket para pay laeng iti panangikabilda iti poste ti kuryente ken dadduma pay a panangurnos iti linya ken poste dagitoy.
