BAGUIO CITY – Nairikep manipud kadagiti turista ti Akiki Trail, Tawangan ken iti deppaat ti summit wenno tapaw ti Mount Pulag.
Intunda daytoy ti panakauram dagiti camp sites ken karuruotan iti nasao a disso idi Sabado.
Sigun kenni Office of Civil Defense – Cordillera information officer Ivy Carasi, timmaud ti uram kalpasan a bimtak ti butane stove nga inaramat dagiti campers.
Nailanad met iti paka-ammo ti Mt. Pulag National Park – Bulletin a ti maipalubos ket ti hiking ken trekking activities iti Babadak Trail wenno Ambangeg ken iti Peak 2 agingga 4, Tower ken Grassland.
Nailanad pay a dagiti addaan ti reservations iti Akiki Trail ken Tawangan ket maiyakar iti Four Lakes ti Kabayan.
Ti Mount Pulag ti kangatuan a bantay iti Luzon ken maikatlo a kangatuan a bantay iti entero a Pilipinas.
