Opisial a nailukaten ti Sundown Namnama Clinic iti uneg iti Baguio Convention and Cultural Center kas paset iti panagregget iti City Health Services Office iti Baguio, kadua ti Department of Health – Cordillera, a labanan ti ngumatngato a bilang iti kaso iti HIV iti siudad.
Ti kaunaan a sundown clinic nga imanmanehar iti gobierno ket agserbi a natalged a lugar para iti HIV counselling ken testing, panangipaay iti impormasion seknan iti reproductive health ken dadduma pay a serbisio tapno maliklikan ti sexually transmitted infections (STIs).
Babaen iti nasaysayaat a setup, nalaka nga access, ken ti oras iti operasion manipod ala-una iti malem agingga iti alas-deiz iti rabii, manipod Lunes agingga Sabado, ket mabalin a makaala iti serbisio kadagiti indibidual nga ad-adda a komportable ken awanan iti buteng wenno stigma.
Ti nasao a klinika ket idadauloan iti maysa nga operations manager ken supsuportaran dagiti kameng iti HSO ken DOH–CAR.
Mangipapaay daytoy kadagiti materiales seknan iti reproductive health, kagawaan a panangliklik iti STI a kas iti condom ken lubricant, ken HIV testing kits.
Sigun kenni City Health Officer Dr. Celiaflor Brillantes, daytoy ti kaunaan a government-to-government innovation iti Cordillera ken iti Pilipinas.
Kadawyan a dagiti sundown clinic ket ipatpataray iti pribado a sektor.
Agserbi daytoy kas halfway house para iti pre-test, counselling, edukasion seknan iti HIV, referral para iti panangagas ken dadduma pay.
Kabayatanna, nagyaman ni Brillantes kenni Mayor Benjamin Magalong, iti City Council iti panangidaulo iti Committee on Health nga idadauloan ni Councilor Elmer Datuin, ken iti DOH-Cordillera para iti pannakaibangon ti nasao a proyekto.
