Impasigurado ni Agriculture Secretary Francisco Tiu Laurel Jr. nga agtaltalinaed nga umdas ti suplay dagiti makan iti pagilian iti likod ti panagngato ti presyo ti produkto a petrolyo iti pagilian gapu iti tensyon idiay Middle East.
Sigun iti nasao nga ahensiya, awan pay laeng ti kinakurang ti suplay ti makan ken umdas pay laeng ti imbentaryo agingga Hunyo iti agdama a tawen.
Dinakamat metlaeng ni Laurel, Jr. a gapu daytoy iti harvest season ken dinakamatna nga adda ti umdas a reserba ti pagilian partikular iti bagas.
Pinasingkedan daytoy ti National Food Authority (NFA) no sadino dinakamatda nga adda iti agarup 400,000 metric tons a buffer stock ti bagas.
Innayon ti nasao nga opisina a posible a manayunan pay daytoy gapu iti mannarimaan a panag-ani ken iseserek dagiti imported rice.
Malaksid iti bagas, innayon ti Department of Agriculture nga umdas metlaeng ti suplay dagiti nateng gapu ta tiempo ita ti panag-aani kagiddan iti panagmula manen dagiti mannalon iti sumaruno nga imulada.
Umdas metlaeng , sigun iti ahensiya ti imbentaryo dagitoy iti imported a baboy bayat nga umad-ado metten ti lokal a produksyon.
In season metlaeng dagiti mais, asukar, ken sibuyas sigun kenni Laurel, Jr.
Nupay kasta, innaklon daytoy nga adda ti ngimatoan dagiti presyo gapu iti gastos iti transportasyon ken freight nga ituntunda ti global developments.
Kabayatanna, impakaammo ni President Ferdinand Marcos, Jr. nga agtultuloy agingga Hunyo ti agdama a tawen ti programa a P20 tunggal kilo ti bagas para kadagiti benepisyaryo. //bombokcs
