BAGUIO CITY – Agsagsagana ita dagiti cutflower producers ken vendors sadiay La Trinidad, Benguet para iti Panagbenga 2018 ti siudad ti Baguio.
Sigun kenni Andy Colte, presidente ti La Trinidad Cutflower Vendors and Growers Association, manarimaan ita ti panangpaadoda iti suplay ti mulada a sabong.
Kinunana a babaen iti daytoy ket umdas ti suplay a mailako ken maiparang iti maangay a Baguio Flower Festival inton sumaruno a bulan ti Pebrero.
Sigun kenkuana, iti agdama ket bassit paylaeng laeng ti naawatda nga orders para kadagiti maiparada floats kabayatan ti grand float parade.
Dinakamatna nga adda met laeng dagiti participants iti grand float parade a gumatang iti sabong iti kadagiti cutflower vendors iti siudad ti Baguio.
Innayonna a pagsagsaganaanda metlaeng dagiti orders manipud Metro Manila gaputa ad-adu pay ti volume ti sabong a kasapulan nga ipaayda kadagitoy.
