Impetteng dagiti hogdealers nga agkurkurang itan ti supply ti baboy iti siudad ti Baguio.
Iti pannakiuman ti Bombo Radyo kenni Marissa Gismundo- hogdealer/wholesalers/retailers, impeksana a marigatan dagitoy nga agbiruk wenno agala kadagiti baboy kadagiti nagduduma a probinsya gapu iti sakit ti baboy nga agraraira partikular ti African Swine Fever (ASF).
Sigun kenkuana daytoy ket nangrugi idi disyembre a medyo marigatanda nga agbiruk iti gatangenda a baboy ngem simmayaat daytoy idi bulan ti pebrero ngem ita a bulan ti Abril ket agkurkurang manen ti supply ti baboy.
Imbinglayna a manipud iti uppat a pulo nga average ti baboy a maal-alada iti maysa nga aldaw ket nagbalinen a dua pulo agingga trenta laengen.
Gapu iti dayta, mapilitan dagitoy nga agala kadagiti nangingina nga idiaydiaya dagiti hog raisers.
Imbinglayna pay a gapu iti nangina a panangted dagitoy kadagiti retailers, dagiti sumagmamano ket mas pilyendan iti frozen a karne iti baboy gapu ta nalaklaka daytoy.
Kagiddan dayta, agkidkidaw daytoy iti tulong iti gobierno tapno matulunganda gapu ta uray adda iti price control nga iyulog ti gobierno ngem saanda met a kontrol ti presyo ti pangted dagiti hog raisers.
Kinuna pay a nasaysayaat nu adda iti mapasamak a tungtungan iti nagbaetan dagiti suppliers ken buyers.//Bombo Noveh Organo
