DUBAI – Agtaltalinaed a parikot ti suplay ti danum ken kuryente iti sumagmamano a paset ti Dubai idiay United Arab Emirates kagiddan ti napasaran a napigsa a tudo a nangitunda iti nakaro a panaglayos.
Sigun kenni George Lusadan, maysa a fitness ken martial arts trainer iti nasao a pagilyan, manipud idi kalman a nakapasamakan ti layos ket ditoy metten a napukaw ti suplay ti kuryente a nakaro a nang-apektar iti suplay ti danum.
Dagiti dadduma a residente ken umili sadiay ket napanda pay nakisakdo ti danum kadagiti karruba da a mosque tapno adda ti mausar da iti panagluto ken pagdigos.
Immuna met a naobserbaran na ti pannakaibus dagiti tagilako a danum kadagiti pasdek nangruna kaditi malls, grocery stores ken convenient stores ngem dagus met laeng daytoy a naipaayan ti suplay.
Innayon pay ti Cordilleran OFW, iti sangapulo ket lima a tawenen a mangmangged idiay Dubai ket ita laeng a nakapadas ti nakaro a tudo ken layos.
Nupay immunan a nagpakdaar ti Dubai Government iti epekto nga itunda ti cloud seeding ket saan da a ninamnama ti dakkel a layos a nangparalisa iti komunikasyon ken transportasyon.
Pagyamyamananna pay nga iti baet iti napasamak ket awan ti nadangran wenno nakaro a naapektaran a Pinoy nangnangruna dagiti kakailyan a Cordileran.//Bombo Jordan Tablac
