BAGUIO CITY–Awanen ti magatang a bagas ti NFA iti merkado publiko ti siudad ti Baguio inton sumaruno a lawas.
Iti panakiyuman ti Bombo Radyo kenni Angelita Gayados, presidente ti rice section iti Baguio City Public Market, kinunana nga ita a lawas ti maudi a panangited ti NFA iti suplay ti bagas daytoy kadagiti otorisado a rice outlets.
Sigun kenkuana, daytoy ket gaputa awan pay ti simmangpet nga import wenno bagas a nagtaud iti dadduma a lugar nangruna ta saan pay a naipalubos ti panag-angkat ti NFA manipud iti dadduma a pagilian kas iti Thailand, Vietnam ken Singapore.
Kinunana a gapu iti kaawan ti bagas ti NFA ket agilakodan kadagiti maaw-awagan a Philippine rice.
Dinakamatna a ti paka-ammo kadakuada ket ag-urayda agingga iti bulan ti Hunyo.
Nupay kasta, impasiguradona a no agkurang wenno maibus ti suplay ti NFA rice ket adu met dagiti commercial rice.
Naamuan pay nga agtaltalinaed a tallo a kilo ti NFA rice ti maipalubos a gatangen ti maysa a tao iti innaldaw.
