BAGUIO CITY – Agkurkurang ti suplay ti strawberry iti Munisipyo ti La Trinidad, Benguet.
Sigun kadagiti vendors sadiay, daytoy ket gapu iti napasaran a panagtudo iti bulan ti Disyembre ken Enero.
Kinunada nga adda met laeng ti epekto ti nalam-ek a klima gaputa marigatan dagiti nasao a mula nga agbunga.
Nupay kasta, impanamnamada a napintas ti kalidad dagiti strawberry a mailaklako iti aglikmot ti Strawberry farm.
Iti agdama ket dumanon iti 180 agingga 200 pesos ti presyo ti tunggal kilo ti strawberry ngem manamnama a ngumato daytoy iti 250 agingga 300 pesos kadagiti sumarsaruno a lawas, depende iti pagkasapulan nangruna ta marambakan ti Strawberry Festival.
Naamoan nga iti aldaw ti Sabado ken Domingo a napigsa ti panaglakoda iti strawberry ken idi napalabas ket dumanon iti 215 pesos ti presyo ti per kilo gapu iti nangato a demand.
Kabayatanna, ti met strawberry picking ket napigsa iti aldaw ti biyernes agingga domingo, ken daytoy ket addaan iti fixed price a 450 pesos bayat a dagiti saan a fixed price ket dumandanon iti 500 pesos.
