BAGUIO CITY – Bimmasit ti suplay ti tilapia nga agtataud sadiay Ambuclao, Bokod, Benguet kasaruno ti agtultuloy a panagraira ti COVID-19.
Sigun kenni Federico Atiw, dadaulo ti Ambuclao Fish Cagers Association, dumanon laeng iti 500kg agingga 1,500kg ti maal-alada iti inaldaw, nabababa daytoy no idilig iti 2,000 kg. a maal-alada idi napalpalabas a tawen.
Inlawlawagna a resulta daytoy ti kinakurang dagiti fingerlings a tarakenen ken paadoen dagiti umili sadiay.
Kinunana a nalimitaran ti panagbiaheda paturong iti Isabela ken Cabanatuan City a kadawyan a pagal-alaanda iti suplay dagiti fingerlings.
Inayonna a maysa metlaeng a nakaapekto iti kinakurang ti suplay ti tilapia ket ti panagbaba ti lebel ti danum sadiay Ambuclao dam.
Gapu iti daytoy, agtaltalinaed a nangato ti demand ken presyo ti tilapia nga iti agdama ket magatang iti P130-P140 ti maysa a kilo.
