BAGUIO CITY – Kidkiddawen ti asosasyon dagiti agtartaraken ti ikan sadiay Ambuclao, Bokod, Benguet ti tulong ti Bureau of Fisheries and Aquatic Resources (BFAR) kasaruno ti naobserbaranda a panagkurang ita ti suplay ti tilapia a mapapataud dagitoy.
Iti panakiuman ti Bombo Radyo Baguio, kinuna ni Federico Atiw, dadaulo ti Ambuclao Fish Cagers Association nga agkasapulanda ita ti kanayonan a fingerlings nangruna ita a ngimmato ti pagkasapulan ti tilapia.
Dinakamatna a kabayatan ti pandemya ket bimmasit ti apitda a tilapia ken saanda pay a makapataud ti bukodda a fingerlings gaputa iti agdama ket babbasit paylaeng dagiti tarakenda a tilapia.
Kinunana a no adda ti kanayonan a fingerlings nga ipaay ti BFAR-Cordillera ket manayonan dagiti tarakenda ken matulungan pay dagiti fish cagers a nakaro a naapektaran iti agdama a pandemya.
Immuna metten nga inlawlawagna a naksayan ti suplay ti tilapia a mapatpataud dagitoy gapu iti kinakurang dagiti fingerlings nga intunda ti nalimitaran a panagbiaheda paturong sadiay Isabela ken Cabanatuan City a kadawyan a pagal-alaanda ti suplay ti fingerlings malaksid pay iti panagbaba ti label ti danum iti Ambuclao Dam.
Agtaltalinaed met a nangato pagkasapulan ken presyo ti tilapia a magatang ita iti P130-P140 tunggal kilo.
Maipalagip a maysa ti panagtaraken ken panagilako ti tilapia kadagiti pagbiagan dagiti umili ti Bokod, Benguet.
