BAGUIO CITY – Naibusen ti suplay dagiti sumagmamano a drug stores ditoy Baguio City iti over the counter nga agas a paracetamol, ti agas para iti sakit ti ulo ken panateng.
Iti panaki-uman ti Bombo Radyo Baguio kenni Erica Habungan, pharmacist ti De Guzman Drug Store, kinunana a nangrugida a maibusan ti suplay kadagiti amin a brand ti paracetamol kalpasan ti baro a tawen.
Kinunana nga agingga ita ket adu paylaeng dagiti agbiruk iti nasao nga agas isut gapuna a nangipaskildan ti paka-ammo iti kaawan ti suplay ti paracetamol iti drug store dagitoy.
Imbinglay met ni Kirsten Dalapos, pharmacist ti Janmark Pharmacy a mangrugi metten a ma-out of stock ti paracetamol a lakoda.
Kinunana a nangrugi a maibusanda ti suplay ti nasao nga agas idi Nobyembre ti napalabas a tawen.
Impettengna met nga awan ti hoarding wenno panangilemmeng iti suplay ti paracetamol bayat a naobserbaranda nga adu ti gumatang iti nasao nga agas tunggal malpas ti panagbakuna kontra iti COVID-19.
Inlawlawagna a malaksid iti kaadu dagiti gumatgatang ti paracetamol ket awan metlaeng ti sumangpet iti lokalidad a suplay ti agas uray adda ti orders dagitoy.
Inaklonna pay nga awan ti naipasigurado kadakuada no kaano manen nga adda ti sumangpet a suplay ti paracetamol.
Iti agdama, magatang dagiti generic a paracetamol iti P1.50 tunggal pidaso bayat a dagiti branded a paracetamol ket P4 tunggal pidaso.
