BAGUIO CITY – Madanagan ita ti dadduma a meat vendors ditoy Baguio City gapu iti panagkurang ti suplay ti karne ti baboy.
Resulta daytoy ti pannakai-lockdown ti Benguet iti pannakaiserrek dagiti live pigs kalpasan a nagpositibo ti probinsia iti African Swine Fever (ASF).
Sigun kadagiti meat vendors a nainterbyu ti Bombo Radyo-Baguio, saanda nga ammo no sadino ti pagalaanda iti suplay ti karne ti baboy nga ilakoda kadagiti sumaruno nga al-aldaw.
Mainaig iti daytoy ket kinumpirmar ni Nancy Alabanza, maysa a meat retailer ditoy a Baguio City a ngimmato iti 10 aginggat 15 porsyento ti presyo ti tunggal kilo ti karne ti baboy ditoy siudad.
Gapu iti daytoy, umap-apela dagiti meat vendors kadagiti otoridad ditoy Baguio City ken Benguet tapno mapalubusan met laeng ti pannakaiserrek dagiti live pigs a sertipikado a natalged manipud iti ASF tapno agbalin nga umdas ti suplay ti karne kadagiti sumaruno nga aldaw.
