Maan-anop paylaeng ti suspect iti insidente iti pammagsol iti Baguio City idi laeng Hueves.
Napasamak daytoy idiay Gate 5 Pinewoods, Sta. Lucia Subdivision KM3 Asin Road, Baguio City rabbii iti nadakamat nga aldaw.
Karaman iti daytoy ti lalaki a biktima nga agtawen iti limapulo ket tallo(53) a tubo iti Bungabong Villasis, Pangasinan ken ti suspect nga addan iti ligal nga edad a tubo met iti Ivisan, Capiz.
Agpada ti biktima ken ti suspect a construction worker ken stay-in iti lugar a nakapasamakan iti nadakamat nga insidente.
Sigun kadagiti nakaimatang(witness) a katrabahoanda metlaeng, kellaat a dinanug-danog ti suspect ti biktima bayat ti drinking session dagitoy.
Sigun kadakuada, nagpakaasi ti biktima nga isardeng ti suspect ti panangkabilna kenkuana.
Kagiddan dayta, pinadas nga anawaen dagiti witness dagitoy nu sadino, pinagkamangda ti biktima iti pagtaengan ti maysa kadagiti kakabagyanna iti siudad ngem apaman a nakadanun iti nalawag a paset ti kalsada, nadlaw ti maysa a security guard ti agdardara a saka ti biktima rason a dagus metlaeng a naiturong iti pagagasan.
Kabayatanna, dagus met nga immarayat dagiti kameng iti pulisya apaman a naipakaammo kadakuada ti maipanggep iti insidente.
Nupay kasta, nakalibas ti suspect ken saan pay a nasarakan ken narekober ti kutsilyo a pinangbagsolna iti biktima.//Bombo Jez Lapizar
