Nabigbigen dagiti otoridad dagiti suspek iti panakakidnap ken panakapapatay da Anson Que wenno paga-ammo kas Anson Tan ken ti drayber daytoy a ni Armanie Pabillo.
Sigun kenni Philippine National Police chief Police General Rommil Marbil, mabalin nga arrestarenda dagiti sumagmamano a suspek nupay kasta, kayatda a ti mastermind ti matiliw dagitoy.
Gapu iti dayta, naballaagan ti Bureau of Immigration maipapan kadagiti identidad dagitoy tapno saanda a makaruar iti pagilian.
Kinuna met ti Philippine National Police a dagus dagitoy a nangipatungpal iti imbestigasyon kalpasan a naipakaamo a mapukpukaw da Que ken Pabillo kasta met a maatap a ti nasao nga insidente ket saan laeng a maipapan iti kidnap-for-ransom.
Maipalagip a ti bagi dagiti biktima ket nasarakan iti igid ti kalsada sadiay Rodriguez, Rizal idi Abril a nuebe iti agdama a tawen.
Nadiskobre dagitoy a nakaaramat laeng iti underwear, dara-dara ti uloda, nakakarga iti nylon bag, natalian iti nylon ken ti rupa dagitoy ket naka-duct tape.
Naudi met a nakita dagiti biktima idi Marso baente nuebe iti agdama a tawen a nakalugan iti black van.
