Napatawan ti pannakaibalud ita nga aldaw ti maysa a lalaki alyas ” Carla”, maysa a miyembro ti LGBTQ+, agtawen iti 27, ken residente ti Pasig City iti minimum a sangapulo a tawen ken uppat a bulan ken maximum a 17 a tawen ken uppat a bulan kasaruno iti desisyon ti korte a guilty daytoy iti kaso a murder bayat iti promulgation of judgement babaen iti Presiding Judge ti Regional Trial Court ti siduad ti Baguio.
Maipalagip nga idi Marso 8, 2026, nasarakan ti bangkay ti 34-anyos a lalaki alyas Ariel,tubo ti Tacloban City, Leyte, ken miyembro metlaeng ti LGBTQ+ iti uneg ti pagnanaedanda idiay Purok 2, Barangay Fairview, Baguio City.
Iti imbestigasyon ti kapulisan, pasado alas tres agingga alas kwatro ti malem idi Marso 6 idi nakaangot ti maysa a babae nga agtugtugaw iti store na iti saan a nasayaat nga angot manipud iti apartment a renrentaan ti biktima.
Pasado alas-dyes ti rabiiti ti Marso 7 idi dimmalan ti nasao a babae iti apartment ti biktima ken naangotna manen ti saan a nasayaat a pay-ob ti angin.
Gapu iti kanayon a pannaka-angutna iti nabangsit a pay-ob ken saannan a panangkita iti biktima iti manu nga aldaw, inyumanna daytoyen iti akintagikua iti apartment ken Barangay Officials.
Pasado alas tres ti Marso 8, nagturong ti dua a Barangay Kagawad, makinkukua iti apartment, ken dadduma a witness iti renrentaan ti biktima tapno lukatan ken kitaen ti sitwasyon ti biktima.
Nalukatanda ti nasao a kwarto babaen iti duplicate key.
Apaman a nakaunegda iti nasao a kwarto, nadiskubreda ti dara iti datar ken dingdingken nakaro ti bangsitna iti uneg.
Ditoy da metten a nakita ti biktima a nakadasay iti datar a nakoberan iti garbage bag ken badbado.
Gapu iti pannakaalarma dagitoy, dagosda a rinumwar ken inmawagda iti pulis.
Iti inisyal nga impormasyon nga impaay ni PMaj Harriet Bulcio, Station Commander ti BCPO Station 1 manipud iti circumferential evidences dagitoy, sigun iti testimonya ti maysa kadagiti witness, nakatungtongda pay ti suspek no sadino sapsapulen daytoy ti pagigiyanan ti biktima.
Natrace da metlaeng daytoy iti Facebook Chats.
Iti criminal records dagiti dua, naduktalan a nagkadua ti suspek ken biktima iti uneg ti pagbaludan idi Enero 2026 gapu iti pananglabsing iti RA 9165 wenno Comprehensive Dangerous Drugs Act of 2002.
Iti testimonya ti kaaruba ti biktima, naobserbaranna metlaeng ti saan a pamilyar nga indibidual a nagturong iti pagnanaedan ti biktima.
Maysa pay a witness ti nakakita iti suspek a nagdardaras a pimmanaw manipud iti pagnanaedan ti biktima.
Innayon met ni Pmaj Bulcio ti panangpapatay ti suspek iti biktima ket panagtakaw gapu ta natakaw ti selpon, kwarta ken laptop ti biktima. // Bombo Noveh Organo
