Impakaamo ni Atty. Stephen David, abogado ni suspended Bamban, Tarlac Mayor Alice Guo nga ad-adalen ni Guo nu kasano ken kaano daytoy nga agsurrender iti senado.
Sigun kenni David, pagpanpanunotan ni Guo nu kasano daytoy nga agsurrender gapu ta nu agsurrender daytoy a dagus ket posible a mabayagan daytoy a madetain agsipud ta Hulyo 29, 2024 ti sumaruno a hearing.
Kinuna ni David a nagsinaritada kenni Guo babaen ti awag nu sadino impakaamo ni Guo a sitatalinaed daytoy iti pagilian a Pilipinas.
Maipalagip nga itay napalabas kalpasan ti panakairuar ti arrest order kenni Guo kasta met kadagiti kakadua daytoy ket saan dagitoy a nasarakan dagiti Senate sergeant-at-arms.
Kabayatanna, kinuna ni Senator Risa Hontiveros, chairwoman of the Committee on Women, Children, Family Relations, and Gender Equality a nasken nga agparrang a dagus ni Guo nangruna ket saan daytoy a nagpakpakita kadagiti senate hearings.
Immuna metten a naarestar ti accountant ni Guo a ni Nancy Gamo.
