Winaswasen ti Office of the Ombudsman ti innem a bulan nga preventive suspension a naipataw kadagiti 72 a personnel ti National Food Authority (NFA) a nairaman iti naamonalyaan a panakailako ti bagas a pabor kadagiti traders.
Sigun iti desisyon ti Ombudsman, naibilin ti panagsubli iti trabaho sipud pay abril a kinse dagiti nasao nga empleado nga agta-trabaho kas warehouse supervisors iti Central Luzon, Calabarzon, Mimaropa, Bicol Region, Western Visayas, Central Visayas, Zamboanga Peninsula, Northern Mindanao, Soccsksargen, Caraga Region, ken Bangsamoro Autonomous Region in Muslim Mindanao.
Kinuna ti anti-graft body a saanen a kasapulan a maipatungpal ti preventive suspension kadagiti nasao nga empleado agsipud ta naalada metten dagiti amin a kasapulan a dokumento seknan iti nasao a kaso.
Maipalagip nga idi Marso, sinuspendir ti Ombudsman dagiti 141 nga NFA officials ken personnel a nakairamanan ni administrator Roderico Bioco kenni assistant administrator for operations John Robert Hermano — kas paset ti panakaipatungpal ti imbestigasyon iti panakailako ti reserba a bagas ti NFA iti nalaka unay a presyo.
Immuna metten a nawaswas ti suspensiyon order kontra kadagiti 23 a dadduma pay a personnel ti NFA kalpasan a naduktalan nga adda ti biddut iti listaan nga impaay ti Department of Agriculture iti ombudsman.
Gapu iti daytoy, dumanon ita iti 45 nga empleado ti national food authority ti sakupen ti suspension.
