ILOCOS SUR – Saan a mapilaan iti kaso ti driver ti pick-up truck a taga-Benguet nga immunan a naipadamag a nakadungpar iti 7-anyos nga ubing a babae idiay Barangay Uso, Suyo, Ilocos Sur idi Enero 16, 2026.
Iti pannakiuman ti Bombo Radyo Baguio kenni PLT. Marinel Leonen, Deputy Chief of Police ti Suyo Municipal Police Station, nagsasaritan dagiti pamilya ti ubing ken ti driver ti pick-up truck nga agtawen iti 33-anyos ken residente ti Itogon, Benguet nga awan ti maipila a kaso.
Sigun kenni PLT. Leonen, manarimaan ti panagbiruk ti driver ti pick-up ken dagiti kakadwana iti partienda a baboy para iti lamay ti kapamiliada idi nadungparna ti biktima.
Naammoan a nagtaud ti biktima ken ti inana manipud Tagudin ken dimsaag dagitoy manipud iti traysikel iti abay ti balayda ngem bayat ti panangibaba ti ina iti kargada ken panagbayadna iti plete ket saan a nadlaw a timmaray ti anakna iti kalsada a rason iti pannakadungparna.
Naitaray ti biktima iti ospital ngem pimmusay metlaeng daytoy.
Nagballaag met ni PLT. Marinel Leonen kadagiti biahero nga agbalinda latta a naridam ken aganad iti panagmanehoda.
Binalakadanna met dagiti nagannak a bantayanda a nalaing dagiti annakda nangruna nu adda dagitoy iti kalsada tapno maliklikan ti aksidente.//Bombo Karen Sapirao
Paalala: Maging sensitibo sa mga komento
