BAGUIO CITY – Immado ti bilang dagiti disposers sadiay La Trinidad Vegetable Trading Post a nabiktima dagiti buyers nga agbaybayad ti bouncing wenno talbog a cheke ken dagiti peke a cheke.
Iti panakiyuman ti Bombo Radyo kenni Agot Balanoy, panakangiwat ti liga dagiti asosasyon sadiay, kinunana a nangipatungpalda iti seminar kadagiti stakeholders seknan iti panakaimaton ti pudpudno a cheke kalpasan a nagreklamo kadakuada ti maysa a disposer a nabayadan ti peke a cheke.
Kinunana a sadiay a naduktalan a dumanon iti agarup P2.5-M ti gatad ti naipaay a peke a cheke iti nasao a disposer malaksid pay nga adu metlaeng kadagiti stakeholders sadiay ti naipaayan ti talbog ken peke a cheke.
Dinakamatna nga ita laeng a tawen nga immado dagiti peke a cheke a naibaybayad kadagiti biktims a disposers gaputa maysa a sample ti aggatad ti P348,600 nga naipaay idi March 2018.
Sigun kenkuana, narigat a mailasin dagiti peke a cheke gaputa dagitoy ket arigna naipa-photo copy a colored a cheke manipud iti nagduduma a bangko malaksid pay nga existing ti account number ngem sabali ti account name ken adda pay dagiti atapenda a naipaaramid sadiay Recto.
Gapu iti daytoy, panggepda nga agsurat iti Bangko Sentral ng Pilipinas ken iti Sangguniang Bayan ti La Trinidad tapnu kiddawen ti tulong daytoy iti panakarisut ti nasao a parikut dagiti disposers.
Kiddawenda ti panang-irteng pay ti Central Bank iti regulasyon kadagiti bangko tapnu saan a basta lattan maikkan iti check book dagiti indibidual nga agap-aplikar iti checking account no kwestionable ti kredibilidad dagitoy.
Balbalakadanda pay dagiti biktima a disposers nga agkamangda kadagiti bangko a nailanad iti peke a cheke tapnu matulongan dagitoy ken maaramid ti kaskenan nga aksion.
Kinunana a maysa a bangko sadiay La Trinidad ti nangipasigurado iti tulongda iti panakaipila dagiti kaskenan a kaso kontra kadagiti mangar-aramat iti naganda kadagiti peke a cheke.
