Nawayawayaan ti tallo a lallaki nga Israeli a balud ken 183 a balud a Palestinian iti maikalima a rikus ti panagsinnukat ti Israel ken Hamas idi laeng kalman.
Kagiddan dayta, inyebkas ti Israel ti pakaseknanda maipapan iti langa dagiti nawayawayaan a kautibo.
Nabigbig dagiti tallo nga Israeli hostages a da Ohad Ben Ami, Eli Sharabi, ken Or Levy, a nakawtibo bayat ti panagatake ti Hamas iti Israel idi Oktubre a siete.
Naipaima dagiti tallo a balud iti Red Cross iti central city ti Deir al-Balah a paset ti Gaza Strip iti maika-491 ti pannakakautiboda idiay Gaza, ken nailadawan a nakuttong ken “pale” idi nagparang dagitoy.
Kalpasan ti pannakawaya-waya dagiti nasao a balud ti Hamas, winayawayaan met ti Israel ti amin a 183 a balud a Palestinian, ken kaaduan kadagitoy ket nagparang a nalukmeg ken nakapuy ti salun-atda.
