BAGUIO CITY – Adda itan iti natalged a kasasaad ti dua nga indibidual bayat nga agpatpataming paylaeng ti maysa kadakuada kalpasan ti panakadangranda iti pannakatnag ti batbato gapu iti panagregaay sadiay Guihob River, Brgy. Kinakin, Banaue, Ifugao idi kalman.
Maibasar iti report ti Banaue Municipal Police Station , nakaawatda iti awag manipod iti maseknan nga umili kabayatan iti panagpatrolya dagitoy iti nasaso a lugar seknan iti pannakadangran ti tallo a menor de edad gapu iti nadakamat nga insidente.
Gapu iti dayta, dagus a nagresponde dagiti personel ti Banaue MPS para iti pannakaiturung dagitoy iti pagagasan.
Iti met imbistigasyon, naamuan a nagturong iti waig dagiti ubbing tapnu aglangoy ngem gapu iti agtultuloy a pannagbayakabak ti tudo sadiay ket nagreggaay ti kabatbatuan a paset ti bantay a nangitunda iti landslide.
