ITOGON, BENGUET – Nabigbigen ti kinasiasino dagiti tallo a minero a pimmusay kalpasan a nagaburan iti nargaay a daga ti abong-abong dagitoy idiay Camp 5, Acupan, Virac, Itogon, Benguet pasado ala sais idi rabii, Hunyo 22.
Dagitoy ket da Joemarie Alila Tigibon, 30-anyos, Jomer Alila Tigibon, 28-anyos agpada a taga-Donsol, Sorsogon ken Ramel Padseco, 24-anyos a taga-Atok, Benguet.
Iti interview ti Bombo Radyo kenni Cyril Batcagan, nakaawatda iti awag manipud iti Itogon Municipal Police Station maipapan iti napasamak a landslide, 6:30 pm idi rabii.
Nagresponde dagitoy kadwada dagiti kameng ti Itogon Municipal Police Station, Bureau of Fire Protection-Itogon, barangay officials, volunteers ken dadduma pay iti nakapasamakan ti insidente.
Nupay kasta, narekober dagiti tallo a biktima nga awanan iti biag.
Naduktalan a matmaturog dagiti biktima idi napasamak ti insidente.
Maibasar iti salaysay ti witness nga agtawen iti 16-anyos, nakitana ti killaat a panagreggaay ti daga a nanggabos iti shanty wenno abong-abong dagiti biktima.
Dagus met a timmaray daytoy rason a saan daytoy a nairaman a nagaburan.
Kagiddan iti daytoy, nagpalagip met ni Fire Officer 2 April Binwag, Public Information Unit ti Bureau of Fire Protection – Itogon kadagiti umili nangruna dagiti agnanaed kadagiti narisgo a disso nga agalerto dagitoy nangruna ita a panawen ti panagtutudo ken dagus a makikoordinar dagitoy kadagiti awtoridad nu adda ti mariknada nga aniaman a senyales iti panagaraw ti daga.
