BAGUIO CITY- Naduktalan ti Benguet Global Adult Tobacco Survey (BeGATS) 2021 a tallo manipud iti sangapulo nga adulto nga agtawen iti 21 agingga 55 iti probinsia ket agsigsigarilyo.
Ti nasao a panagadal ket naipatungpal iti maudi a kwarter ti 2020 nu sadino 25.8% manipud iti 1,107 a pakabuklan a bilang dagiti respondents ti nakumpirmar nga agsigsigarilyo.
Maibasar iti resulta, 14.2% kadagiti smokers ket nangrugi a nagsigarilyo idi agtawen dagitoy ti 12 agingga 18; 15.4% kadagiti smokers ti agsigsigarilyo ti maysa agingga lima nga stick tunggal aldaw ken 9.6% kadagitoy ti agsigsigrilyo kalpasan ti panagriingda iti agsapa, kabayatan ti panag-inana iti trabaho ken kalpasan ti panangan dagitoy.
Kaadoan wenno 11.2% kadagiti smokers ti nangkuna a nagbalinen a bisyoda ti panagsigarilyo bayat a 9% ti nangkuna a pang-ikkat daytoy ti stress.
Naduktalan a 20.9% kadagiti smokers ket ammoda dagiti agbalin nga epekto ti panagsigarilyoda iti salun-atda.
Iti met benneg ti smoke cessation, 9.3% kadagiti respondents ti agtarigagay nga agsardeng nga agsigarilyo bayat a 3.9% ti agpaplano nga agsardeng nga agsigarilyo iti uneg ti innem a pulo nga aldaw.
kabayatanna, supsuportaran ti Benguet Provincial Health Office ti panakaital-o ti smoke-free environment ken ti nasalun-at a panagbiag.
Gapu iti daytoy, guyguyogoyen ti nasao nga opisina dagiti lokal a gobierno tapno aktibo nga iyemplementarda ti polisiya seknan iti panakaiparit ti panagaramat, panaglako, panangiwaras ken panangita-o iti sigarilyo, electronic nicotine, non-nicotine delivery systems, ken daduma pay a tobbaco products iti masakupanda a lugar.
Babaen iti nasalun-at a panagbiag ket masalwadan ti bagi ken ti pamilya.
