Impakaammo ni Atty. John Paul Martin ti Election officer iti siudad ti Baguio a nagwithdraw iti kandidaturada dagiti tallo nga agkandidato iti kina-konsehal iti siudad ti Baguio.
Iti interview ti Bombo Radyo kenkuana, kinunana a daytoy ket pakairamanan da Thomas Tabcao, Fred Go ken Franco Chanco.
Sigun kenni Martin, adda pay ti maysa a pimmusay nga agngayngayangay iti kina-konsehal ngem nasukatan metlaeng a dagus daytoy.
Malaksid iti dayta, adda metlaeng dagiti tallo nga indibidual manipud kadagiti nagduduma a partido ti indeklara iti law department kas independent candidate, pakairamanan daytoy ti maysa iti kina-mayor ken dua iti kina-konsehal.
Kinuna a naideklara dagitoy kas independent gapu paylaeng iti kinakurang ti requirements nga insubmitirda.
Nupay kasta, mabalin paylaeng dagitoy nga umapela iti law department tapno mainayon dagitoy iti nakipasetanda a partido.
Iti agdama, pakabuklan iti uppat a pulo nga indibidual ti agngayngayangay iti siudad ti Baguio, pakairamanan daytoy dagiti pito a tumaray iti kina-kongresista,innem iti kina-mayor, dua iti kina-bise mayor ken dua pulo ket lima iti kina-konsehal.
