BAGUIO CITY – Napagnunumuan dagiti opisyales ti Benguet ken Provincial IATF nga agpaot laeng iti tallo nga aldaw ti panakaisayangkat ti lamay dagiti pimmusay kasaruno ti agtultuloy a panagngato ti kaso ti COVID-19 gapu iti taripnong nga at-atendaran dagiti tattao.
Dinakamat ni Governor Melchor Diclas a kadawyan a pakaal-alan dagiti nagpositibo iti COVID-19 ket kadagiti lamay ken kasar nu sadinno saan a maob-obseran ti social distancing.
Inyunay- unay met ti provincial IATF ti panagtungpal dagiti umili kadagiti pagalagadan ken binilinda dagiti opisyales tunggal munisipyo iti naing-inget pay a pannangimplementarda kadagiti health protocols iti masakupan dagitoy.
inaklon pay ni Gov. Diclas a napunno dagiti isolation facilities iti probinsiya a rason ti panakikoordinarda iti Department of Education para iti temporaryo a panakabulod dagiti pagaladan nga agserbi kas isolation facilities dagiti agpositibo iti COVID-19.
